।।तापीस्तोत्रम्।।

छाया विवस्वद्दुहिता हितार्था पुरातनी त्वत्र धुनी कृतार्था।।

ययाssस भूरन्यविभूषितापि तापीसरित्साsवतु मां स्मृतापि।।१।।

तपती पतिमाप्तुमुद्गता वरविंध्याद्रिपदान्महोन्नता।।

प्रययौ नवयौवनाञ्चिता जलधिं पश्चिमकं ह्यवञ्चिता।।२।।

पुनानापि नानाजनानंहसोsत्र पदं राति याति प्रशस्तं परत्र।।

यदीये प्रतीरे त्र पापी न तापी न कोपीयमस्मानवत्वत्र तापी।।३।।

भुजंगप्रयातोपमा यद्गतिर्या मतिं नः पुनाना ददाना गतिं या।।

वरं पश्चिमाब्धिं सुखेनोपमेये हतत्वद्य तान् पाप्मनः सन्ति ये मे।।४।।

अवरजा वरजातिसुपूजिता द्युमणिजा मणिजातिविभूषिता।।

सुतपती तपती पतितान्नतावती सा यशसा पयसान्विता।।५।।

या वारयत्याशु यदिन्द्रवज्रलेपोपमं पातकमाप्लवेन।।

प्लवेन यज्ञेन तथा गतिर्न यथा नदी राति सहाप्लवेन।।६।।

जगति तपनशीला याहि तापी सुशीला, चलति भुवि विशाला मुक्तिपानीयशाला।।

परिहृतजनकाला खेलदुच्चोर्मिमाला, निखिलसुकृतपाला पातु नः सूर्यबाला।।७।।

अये तापीहापि प्रशमितभये ते सुखमये, सदा दत्तात्रेयो निवसति सतिप्रार्पितनये।।

न ये त्वां सेवन्ते त इह जनिभाजोsत्र भजते, गतिः सद्यो रासीत्यत ऋषिगणस्त्वां हि भजते।।८।।

दत्तात्रेयादृतां तापीं पापिनिर्मुक्तिमष्टभिः।। पद्यैस्तुष्टाव सुकृती वासुदेवसरस्वती।।९।।

इति श्री प. प. श्रीवासुदेवानन्दसरस्वतीविरचितं तापीस्तोत्रं संपूर्णम्।।