३६

श्रीनरसिंहस्तोत्रम्

 जय जय भयहारिन् भक्तचित्ताब्जचारिन्। जय जय नयचारिन्दृप्तमत्तारिमारिन्।।

जय जय जयशालिन्पाहि नः शूरसिंहः। जय जय दययार्द्र त्राहि नः श्रीनृसिंह।।१।।

असुसमरधीरस्त्वं महात्मासि जिष्णो। अमरविसरवीरस्त्वं परात्मासि विष्णो।।

सदयहृदय गोप्ता त्वन्न चान्यो विमोह। जय जय दययार्द्र त्राहि नः श्रीनृसिंह।।२।।

खरतरनखरास्त्रं स्वारिहत्यै विधत्से। परतरवरहस्तं स्वावनायैव धत्से।।

भवभयभयकर्ता कोsपरास्तार्क्ष्यवाह। जय जय दययार्द्र त्राहि नः श्रीनृसिंह।।३।।

असुरकुलबलारिः स्वेष्टचेतस्तमोsरिः। सकलखलबलारिस्त्वं स्वभक्तारिवैरी।।

त्वदित स इनदृक् सत्पक्षपाती न चेह। जय जय दययार्द्र त्राहि नः श्रीनृसिंह।।४।।

सकलसुरबलारिः प्राणिमात्रापकारी। तव भजकवरारिर्धर्मविध्वंसकारी।।

सुरवरवरदृप्तः सोsप्यरिस्ते हतो ह। जय जय दययार्द्र त्राहि नः श्रीनृसिंह।।५।।

दहनादहहाब्धिपातनाद्गरदानाद्भृगुपातनादपि।

निजभक्त इहावितो यथा नरसिंहापि सदाव नस्तथा।।६।।

निजभृत्यविभाषितं मितं खलु कर्तुं त्वमृतं दयाकर।

प्रकटीकृतमिध्ममध्यतो निजरूपं नरसिंह धीश्वर।।७।।

नाराधनं न हवनं न तपो जपो वा। तीर्थं व्रतं न च कृतं श्रवणादि नो वा।।

सेवा कुटुंबभरणाय कृतादिदीना। दीनार्तिहन् नरहरेsघहरे ह नोsव।।८।।

इति श्री प. प. श्रीवासुदेवानन्दसरस्वतीविरचितं श्रीनरसिंहस्तोत्रं संपूर्णम्।।